16-17 Augustus 2017, Pretoria

Daar is verskeie nasionale en internasionale instansies wat tans – om verskeie redes – Afrikaanse materiaal (byvoorbeeld taal- en letterkundige werke, kultuurhistoriese materiaal, akademiese naslaanwerke en argiefmateriaal) digitiseer. Tot dusver is daar nog geen bestekopname gemaak van al hierdie verskillende digitiseringsinisiatiewe nie, en die vermoede bestaan dat daar in hierdie verband heelwat duplisering en oorvleueling plaasvind (wat weliswaar al bevestig is deur kontrole in van die databasisse).

​

Die Virtuele Instituut vir Afrikaans (VivA), Noordwes-Universiteit se projek rakende die Digitale Bibliografie van die Afrikaanse Taalkunde (DBAT) en die biblioteek van die Universiteit van Pretoria se Open Scholarship-afdeling wil daarom graag alle instansies wat gemoeid is met of belang het by die digitisering van Afrikaanse bronne na ʼn gespreksgeleentheid nooi.

​

Hierdie gesprek, wat die vorm van ʼn kollokwium sal aanneem, het ten doel om die volgende te ondersoek:

​

1. Watter organisasies digitiseer tans Afrikaanse bronne op een of ander wyse?

2. Watter Afrikaanse bronne is reeds gedigitiseer?

3. In watter formaat is hierdie digitale Afrikaanse bronne beskikbaar, en aan watter formate is daar ʼn behoefte?

4. Watter digitiseringsinisiatiewe oorvleuel en behels duplikasie?

5. Watter behoeftes rakende digitale Afrikaanse bronne bestaan daar?

6. Watter samewerkingsgeleenthede kan geïdentifiseer word om die digitisering van Afrikaanse bronne optimaal te bestuur ten einde onnodige duplisering en oorvleueling te vermy en veral hulpbronne te deel en te bespaar?

Die uitnodiging is dus om te kom saam dink en besin oor die geïntegreerde en gekoördineerde bestuur van die digitiseringsproses. Een van die moontlike uitkomste is die oprigting van ʼn Digitale Biblioteek vir Afrikaans (DBA).

Ons versoek alle betrokke instansies om ten minste een verteenwoordiger na hierdie kollokwium te stuur. Hoewel dit nie ʼn voorvereiste vir bywoning is nie, sal ons dit op prys stel indien u tydens die kollokwium ʼn kort aanbieding (van 10 of 20 minute) maak oor u instansie se digitiseringsinisiatief of -behoefte waarin u onder andere die volgende vrae beantwoord:

​

1. Met watter digitiseringprojek(te) is u tans besig?

2. Watter digitale Afrikaanse bronne is reeds deur u beskikbaar gestel?

3. Watter probleme of uitdagings ondervind u tans rakende die digitisering van Afrikaanse bronne?

4. Watter ander/toekomstige digitiseringsinisiatiewe beplan u?

5. Watter digitiseringshulpbronne (insluitende finansiële ondersteuning) het u tans tot u beskikking?

6. Indien u nie self by enige digitiseringsprojek betrokke is nie, aan watter gedigitiseerde Afrikaanse bronne het u tans ʼn behoefte?